| |
今日又番幼稚園lu=3=
(講到好似自己去讀咁....)
今朝D老師去晒開會
9點鐘之前我地就去全日班度頂住先...
其實都冇咩野做
D小朋友o岩o岩食晒早餐
已經自己一堆堆咁玩緊...
有幾個小DD玩緊"家庭角"
(估唔到會有咁多男仔爭住玩煮飯仔~ )
埋去撩下佢地啦
佢地就叫我坐低做客人點菜喇=0=
呢間「全日班餐廳」D服務真係OK架喎
D侍應仔會幫你拉埋櫈請你坐
仲即刻拎杯水俾你飲(當然係得個吉杯架啦)
真o既酒店都冇呢樹咁高級
我隨口up叫左個豬柳蛋漢堡 (其實都唔知點解叫呢個= =)
過一陣(佢地真係o係個"廚房"度又開爐又調味... )
D大廚真係砌左個豬柳蛋漢堡出黎...
係一個有隻煎蛋鋪o係面o既漢堡包(當然係膠玩具+膠玩具啦)
仲附送一杯相信係汽水o既東西(吉杯)
真係過癮...
阿大廚話一陣仲有甜品食添喎~
最後因為要開始上堂所以冇"食甜品"
不過我真係好想知佢會拎D咩野俾我囉XD
之後就番去K3B班喇
又見到班可愛o既小朋友喇=3=
不過今日個南南又黎喇.........
佢話要同我結婚呀點算好呀
(真係打從心底裡唔知點應佢好....)
今日上堂流程大致上同上星期差唔多:
1. 英文堂玩傢具同D bedroom呀sitting room之類o既配對
(呢D字我記得我小學二年班先學架... )
2. 中文就學寫「看見」同埋唱下兒歌
大概係講太陽出黎之後
「小草悄悄長高了，小孩熱得呱呱叫」之類(淨係記得呢2句)
3. 繼續畫下雨天(今日都冇落雨...)
可能係因為之前教過紅色暴雨同黑色暴雨
所以有D細路油到幅畫又紅又黑
但係有D又油到仲colourful過復活蛋...
4. 聽黃老師講故事~
其實係講植物生長o既要素(陽光空氣諸如此類)
不過用左故仔黎包裝~
5. 去小操場碌地沙
真係鋪張野o係地下然後D細路逐隻咁碌....
6. 自由活動...目睹小朋友危險駕駛(o個D玩具反斗城大膠車呢...)
佢地似玩碰碰車多D囉...........
仲有小朋友砌o個D巨型LEGO(成舊磚頭咁大架)
砌到23層，仲高過佢地自己添呀!!
下晝又係做雜務...
主任又叫我改通告喇!!!!!
改得勁小心...唔想好似上次咁要改N咁多次......
之後又準備11月o既茶點單同埋全日班o既餐單
而家D細路就好啦
D野食勁豐富
執執下我發現有D日子撞野食(例如連續兩日餐單上面都有餐蛋包)
又有D日子早餐撞茶點(即係朝早飲完豆漿，晏晝又係飲豆漿咁)
就mark低佢問主任
哈哈~主任讚我細心呀
(太好喇......快D忘記我D蠢鈍大頭蝦野啦= =)
今日見D老師都好忙...
可能係因為要準備搞萬聖節D節目
放左學又要搞小朋友D課外活動
遲D又好似有表演之類要準備
又要幫D親子旅行團book旅遊巴book鬼book怪
小朋友遲D去公園郊遊，又要搵人出去視察場地...
真係忙到打仗咁...............
大事我地就幫唔到D咩手
唯有做多D細微雜項幫輕下老師們啦
打下野，check下回條
upload下學校網頁D相
整下裝飾咁....
竟然做到過左鐘都唔知添!
哈~~下個星期繼續啦=]
嘩
乜打左咁多野o既?!
|
| | Posted 10/27/2009 10:46 PM - 9 Views - 4 eProps - 4 comments
- recommend
  - recs0
- share
- email
 - sent0
|
